BirdLife Hordaland

Det er knapt meir enn éin månad sidan styret i BirdLife Hordaland påpeikte under eit styremøte at me framleis ikkje hadde klart å nå det «magiske» talet i medlemsregisteret. Sidan den gong har medlemstalet stige jamt og trutt, og den 14. november bikka det altså endeleg over 1 000 medlemar! Denne milepålen representerer ikkje berre ein auke i medlemstalet, men også ei breiare støtte for bevaringsarbeidet foreininga utfører i regionen.

BirdLife Hordaland vart dermed det fjerde fylket som har rundt 1 000 medlemar. No er me i selskap med Oslo, Trøndelag og Rogaland. Naturen treng alle stemmer den kan få, så me takkar varmt for innmeldingane. Ei lita gåve er på veg til vårt 1 000. medlem, Kjersti.

Det har vore ei positiv utvikling over fleire år med god tilstrøyming til foreininga. Særleg under pandemien var tilstrøyminga særdeles god. I fjor fekk me inn 77 nye, og så langt i år har me fått 80 nye medlemar. Ein rask kikk på kjønnsfordelinga viser at me no har ein kvinneandel på 41%. Dette er verd å glede seg over i ei foreining som for ikkje mange år sidan vart sett på som svært mannsdominert.

Lokallaga tilhøyrande BirdLife i Hordaland har gjennom mange år vore aktive med å arrangera ulike turar og gjennomføra tiltak for å auka merksemda om fuglar og fuglevern. Eit særs vellukka tiltak i denne samanhengen er vipeprosjektet i Herdla naturreservat, som har vist at velfundert bevaringsarbeid fungerer, og at det er mogleg å driva fuglevern i godt samarbeid med lokale bønder.

Det er gledeleg å sjå at arbeidet til foreininga gir resultat, og at folk i Hordaland verkeleg bryr seg om fuglar og den omkringliggjande naturen. Med stadig aukande trugslar mot økosystema og mangfaldet av fugleartar, er det inspirerande å sjå at stadig fleire vel å støtta opp om og engasjera seg i foreininga vår. Den veksande medlemsmassen gir oss ei lita von om at fleire ønskjer å ta ansvar for å verne om naturen for komande generasjonar.